Halako ezaugarriak dituen gune bat zaharberritzeak eraikitzeko beste modu batean murgiltzea dakar. Eraikitzeko modu hori ez da teknikoki hain konplexua, baina ezberdina da, izaera enpirikoa baitu: milaka urtetan zehar, gizakiak, ingurunera ezin hobeto egokituz, garatu duen arkitektura praktiko, landatar eta teknologikoki sinplea da. Horregatik da garrantzitsua gatzagek hasieratik gaur arte izan duten eboluzio historiko eta arkitektonikoa ezagutzea, horri esker ikas baitezakegu iraganeko akatsetatik, gehiago errepika ez daitezen.